بعض اعمالى الفنية المتواضعة

احب ان اعلمكم يا افاضل بانه قد تم اضافة بعض شخبطاتي الحرة التى يطلق عليها فنية ...الى المدونة

و بها بعض رسومات بالرصاص .. و الحبر .. و بعض بالالوان المائية .. و اخرى تصميمات فوتوشوب ..و تصوير فوتوغرافي ... حاجه كده على القد ..

و اليكم هذه الشخبطات بالتفصيل

يسعدني ارائكم و نقدكم ..

آآآآآآآآآآآآآآآآآآآآآآآآآآه يا نافوخي يانا

تعليقا على الخبر ده

الشريف يتقدم ببلاغ إلي اللجنة العليا للانتخابات بشأن مخالفات بعض المرشحين
ثلاثة من مرشحي الوطني يتقدمون بشكاوي حول مخالفة قواعد الدعاية الانتخابية

آآآآآآآآآآآآآآآآآآآآآآآآآآه يا نافوخي يانا


عسل و الله انكل صفوت ده و دمة شربات ...
ربنا يخليه لمصر .. و يحمية لشبابه و يبارك فى طقم سنانه و فى قيادته الباسلة التى تحفظ مصر من شر هذه الطائفة المدسوسة على الشعب المصرى و الافرواسيوي ..

ربنا يحفظك يا مبارك انت و ولدك و حفيدك و سدد خطا جهاز امنك قادر با كريم ..

مفيش طريقة انسب من اللى انكل صفوت عملها هو و القطاقيط الحلوين اللى قدموا البلاغات _ قطاقيط مغمضة .. ملايكة بجناحات ماشيه على الارض ... كلهم راحوا يقدموا البلاغات بنفسهم رغم انه كان ممكن اللى صورلهم الورق فى مقر الحزب يروح هو وخلاص _... فى الحقيقة انا بتعلم من الحزب الوطني كل يوم حاجة جديدة .... و المرادي انا بتعلم منه الايجابية ....ااايييوووه ..الايجابية .. يعني كانوا ممكن يشوفوا الشعار اللي هيقضى على مستقبل مصر و ماضيها و يتسبب فى تصدع قفا ابو الهول و فى خروج مصر من تصفيات كأس العالم 2010 فى جنوب افريقيا بيتعلق قدامهم و يسكوتوا و يقولوا احنا مالنا ..خليك فريش احنا فى انتخابات .. هو احنا فاضيين كفاية اللى ورانا .. ده اللى وراه عيل ولا اتنين بيبقى لايص . مابالك باللى وراه سبعين مليون ... لكن ... لا .... لا .. و الف لا .. ليست هذه اخلاق الحزب الوطني الدمياطي ... ااااصدى الديموقراطي .... كله يهون غير اننا نشوف حاجه تفرق بين فصافيص الشعب المصري و لا لنشر روح الكراهية و البغض والبعبع ابو رجل مسلوخة بين افراد الشعب .... لا لأى عقبة تقف حائلا بين البلاد و بين القيادة و العبور للمستنقع .. لا لتعطيل مسيرة التقدم اللى هتودينا ورا الشمس و اللى نفسى اعرف هما يقصدوا ايه بالتقدم ده ... لا لتحويل مصر لأى شىء غير هذه الجنة التي نحيا فيها ..............................

لكل هذا ..
لا للإخوان ....

و لا للإسلام ..
و لا لهو ..
و لا للحل

عــاطــفــة

هذه مجرد عاطفة مرت بى وددت ان اكتبها فى سطور ...
فوقتى هذه الايام مزدحم للغاية و لا اجد فرصة لأكتب شيئا غير هذه الكلمات العابرة

مجرد برقيات سريعة فى نقاط مختصرة ..

الاولى
الى مدونتي:
كم احببتك على قصر المدة التى قضيناها سويا ..... شكرا مدونتى ..

الثانية
الى اصدقائى من المدونين و المدونات :
قد استفدت منكم الكثيرفى هذا الوقت القصير ... جزاكم الله عني خيرا

الثالثة :
الى غد :
كم اتمنى ان تكون افضل من اليوم بكثير و ان تتحقق فيك امالي ..


اخيرا
ارفع يدي الى الهي و خالقي و ادعوه ان يرضى عنا جميعا حقيقة الرضا الذي لا يعقبه سخطا ابدا
و ان يجعلنا اخوة متحابين على سرر متقابلين فى جنات النعيم في اعلى عليين مع النبي المصطفى الامين صلى الله عليه و على آله و صحبه أجمعين..
اللهم آمين